උග්ගල් අළුත්නුවරකතරගම් දේවාලයට සම්බන්ධ ප්‍රවේණි රාජකාරි සේවාවන් පිලිබඳ විස්තර

^{උග්ගල් අළුත්නුවරකතරගම් දේවාලයට සම්බන්ධ ප්‍රවේණි රාජකාරි සේවාවන් පිලිබඳ විස්තර}

_{අළුත්නුවර ගමේ පරවේණි පංගු}

අංකය	පංගුවේ නම	එම පංගුවට අයත් සිරිත් රාජකාරි
01	අත්තනායක මොහොට්ටි නිලේ පංගුව	ඉල්මහ කාත්තිය  අවුරුදු කාත්තිය සහ මහ පෙරහැර කරවීම -දින අනුවක් දේවාලයේ අලුත්වැඩියාව
02	මහබෙත්මේ කපුනිලේ පංගුව	කාත්තිවල දී හා මහ පෙරහැරෙ දී දෙවියන් වැඩමවීම දින හතළිහක් දේවාලයේ අළුත්වැඩියා වැඩ කිරීම
03	කුඩා කපු නිලේ පංගුව	ඉහත සඳහන් පංගුවේ මෙන් කාත්ති දෙකේ දී රාජකාරි කිරීම අලුත්වැඩියා වැඩ
04	මහාබෙත්මේ බතවඩන නිලේ පංගුව	මුළුතැන් වැඩීමේ රාජකාරිය-දින විස්සක් අළුත්වැඩියා කිරීම
05	පිරිත් නිලේ පංගුව	පිරිත් කීමේ රාජකාරිය (ගිහියෙකුට අයත් නොවේ)
06	විහාරේ පංගුව	උදේ හවස මල් පුජා කිරීම,දිනපතා ආහාර පුජාව
07	අත්තනායක පංගුව	දේවාලයේ ගබඩාව බාරව සිටීම
08	කිරිල්ලවල අත්තනායක පංගුව	ඉහත සඳහන් පංගුවේ මෙන් රාජකාරි කිරීම-අළුත්වැඩියා කිරීම දින හතළිහයි
09	රත්නායක පංගුව	දේවාලයට අයත් කොඩි,තිර ආදිය ගණන් බලා ආරක්ෂා කිරීම- මුත්තෙට්ටු අටුලෑම,අලුත්වැඩියා වැඩ දින විස්සක්
10	තොටපල්ලේ ගෙබලන පංගුව	දේවාලයේ දොර යතුර බාරව සිටීම-වියන් ඇල්ලීම
11	දැලිගුරු අරාවේ ලිඳගාවා පංගුව	මුළුතැන් බෑම
12	පොකුණේ ගෙබලන පංගුව	දහවෙනි පංගුවේ රාජකාරිය මෙන්ය
13	තොටපල්ලේ පලිහවඩන පංගුව	දෙවියන් වැඩමවන විට පලිහ සහ වියන් ඇල්ලීම,දේවාලය රැකවල් කිරීම
14	බෝගහකුඹුරේ පට්ටිකාර පංගුව	මුළුතැන් සඳහා හුන් කිරි හා තෙල් දීම-අලුත්වැඩියාවේ දින විස්සක් යෙදීම
15	හපුගහ අරාවේ පට්ටිකාර පංගුව	ඉහත සඳහන් පංගුවේ මෙන් රාජකාරි කිරීම-දේවාලයේ වහලවල උළු මාරු කිරීම-නොතෙමෙන සේ පවත්වාගෙන යාම,අවශ්‍ය වූ විට දේවාලයට වලං කලං ආදිය සැපයීම
16	පොකුණේ බරනැන්දු බඩහැල පංගුව	දේවාලයේ වහලවල උළු මාරු කිරීම-නොතෙමෙන සේ පවත්වාගෙන යාම,අවශ්‍ය වූ විට දේවාලයට වලං කලං ආදිය සැපයීම
17	බඩහැල පංගුව	දේවාලයේ වහලවල උළු මාරු කිරීම-නොතෙමෙන සේ පවත්වාගෙන යාම,අවශ්‍ය වූ විට දේවාලයට වලං කලං ආදිය සැපයීම
18	පොකුණේ බඩහැල පංගුව	දේවාලයේ වහලවල උළු මාරු කිරීම-නොතෙමෙන සේ පවත්වාගෙන යාම,අවශ්‍ය වූ විට දේවාලයට වලං කලං ආදිය සැපයීම
19	ගී කියන බඩහැල පංගුව	කාත්ති තුනට දේවාලයට පැමිණ සිටීම - අනික් රාජකාරි-දේවාලයේ වහලවල උළු මාරු කිරීම-නොතෙමෙන සේ පවත්වාගෙන යාම,අවශ්‍ය වූ විට දේවාලයට වලං කලං ආදිය සැපයීම
20	ඉඹුල්පේ ආචාරි පංගුව	දේවාලයේ යකඩ වැඩ කර දීම-දෙවියන් වැඩමවන රථය ඇදීම
21	හටන්පොල ආචාරි පංගුව	දේවාලයේ යකඩ වැඩ කර දීම-දෙවියන් වැඩමවන රථය ඇදීම
22	මාමල්ගහ ආචාරි පංගුව	දේවාලයේ යකඩ වැඩ කර දීම-දෙවියන් වැඩමවන රථය ඇදීම
23	රදාගේ ජාහළු පංගුව	රථය වියන් බැඳීම-පිරුවට දීම-පියවිලි එලීම සහ වෙනත් අවශ්‍යතාවයන් වලදී වියන් බැඳීම
24	සුද්දහළු පංගුව	රථය වියන් බැඳීම-පිරුවට දීම-පියවිලි එලීම සහ වෙනත් අවශ්‍යතාවයන් වලදී වියන් බැඳීම
25	නළුවෙල රදා පංගුව	පත්තිනි දේවාලයේ වියන් බැඳීම-දෙවියන් වැඩමවන විට පියවිලි එලීම
26	පාලම රදා පංගුව	පත්තිනි දේවාලයේ වියන් බැඳීම-දෙවියන් වැඩමවන විට පියවිලි එලීම
27	ගණිත පංගුව	පත්තිනි දේවාලයේ වියන් බැඳීම-දෙවියන් වැඩමවන විට පියවිලි එලීම පෙරහැර සහ කාත්ති උත්සව සඳහා නැකත් සැදීම
28	වැරවුලන්දේ දුනුකාර පංගුව	දෙවියන්ගේ හළු අපුල්ලා දීම,දෙවියන් වැඩම වන විට පියවිලි එලීම,උඩුවියනට පිරුවට දීම
29	රත්නහළු පංගුව	දෙවියන්ගේ හළු අපුල්ලා දීම,දෙවියන් වැඩම වන විට පියවිලි එලීම,උඩුවියනට පිරුවට දීම
30	ගොඩකුඹුරේ තෙල්කාර පංගුව	තෙල් සැපයීම
31	මාලුකාර පංගුව	මුළුතැනට එළවළු දීම
32	හත්තැල්ලේ මාලුකාර පංගුව	ඉහත පංගුවේ මෙන් රාජකාරිය කිරීම
33	මේස්ත්‍රිය පංගුව	දේවාලයේ මැහුම් මැසිම,රථය සරසන විට කොත තැබීම,තේවාවේ දී හක්ගෙඩිය පිඹීම,දේවාලයේ කිරි ඉතිරවීම ,කුඹේ ඇදීම
34	තෝන්ඩිය හක්කාර පංගුව	රථය සරසන විට කොත තැබීම,තේවාවේ දී හක්ගෙඩිය පිඹීම දේවාලයේ කිරි ඉතිරවීම,කුඹේ ඇදීම
35	පාලුහක්කාර පංගුව	ඉහත පංගුවේ මෙන් රාජකාරි කිරීම
36	පත්තිනි කපුනිලේ පංගුව	පත්තිනි කෝවිලේ දෙවියන් වැඩම කිරීම,පාන්මඩුව නැටීම
37	උඩවෑකඩ තම්මැට්ටන්කාර පංගුව	තම්මැට්ටන් ගැසීමේ රාජකාරිය
38	ගුරියඹ ඔතු පංගුව	දේවාලයේ මුලාදෑනින්ට අඩුක්කුවක් දීම
39	මඩමේගේ වත්තෙ පංගුව	අළුත්වැඩියා වැඩ කිරීම
40	සත්කාර පංගුව	දේවාලයට ඔතු දීම
41	ඔතු පංගුව	දෙදවසක් අළුත්වැඩියා වැඩට උදව් දීම,දේවාලයේ මුළුතැන් බෑමේ රාජකාරිය
42	මුළුතැන් පංගුව	දෙදවසක් අළුත්වැඩියා වැඩට උදව් දීම,දේවාලයේ මුළුතැන් බෑමේ රාජකාරිය
43	දැලිගුරු අරාවේ මුරුතැන් පංගුව	දෙවියන් වැඩමවන විට කුඩේ ඇල්ලීම
44	මාමල්ගහ කුඩකාර පංගුව	දෙවියන් වැඩමවන විට කුඩේ ඇල්ලීම
45	මාමල්ගහ පලිහවඩන පංගුව	දෙවියන් වැඩමවන විට කුඩේ ඇල්ලීම
46	වෙරළුගහ කුඹුරේ කුඩාකාර පංගුව	දෙවියන් වැඩමවන විට කුඩේ ඇල්ලීම
47	දිගනෙ කඩකාර පංගුව	පණිවිඩ කීමේ රාජකාරිය සහ බස්නායක නිලමේ කැටුව ගමන් කිරීම
48	තිඹිරිපෙල හෙවනැන්නැහෙ පංගුව	පණිවිඩ කීමේ රාජකාරිය සහ බස්නායක නිලමේ කැටුව ගමන් කිරීම
49	කුඩාගම හෙවැන්නැහෙ පංගුව	පණිවිඩ කීමේ රාජකාරිය සහ බස්නායක නිලමේ කැටුව ගමන් කිරීම
50	කඳුකරගෙ හෙවැන්නැහෙ පංගුව	පණිවිඩ කීමේ රාජකාරිය සහ බස්නායක නිලමේ කැටුව ගමන් කිරීම
51	දාන්දාවෙ  හෙවැන්නැහෙ පංගුව	මාරුවෙන පංගුවක්
52	කරඳගොල්ලෙ හෙවැන්නැහෙ පංගුව	මාරුවෙන පංගුවක්
53	නැකතිගෙ පංගුව	පෙරහැරෙ කවි කීම,තාලන් ගැසීම
54	මලවර පංගුව	පෙරහැරෙ කවි කීම,තාලන් ගැසීම
55	හන්කරාවේ මලවර පංගුව	පෙරහැරෙ කවි කීම,තාලන් ගැසීම
56	මලවර පංගුව	පෙරහැරෙ කවි කීම,තාලන් ගැසීම
57	උඩගෙදර ඉලංගමේ කවිකාර පංගුව	පෙරහැරෙ කවි කීම,තාලන් ගැසීම
58	පාලම කවිකාර පංගුව	පෙරහැරෙ කවි කීම,තාලන් ගැසීම
59	පල්ලේගෙදර ඉලංගමේ කවිකාර පංගුව	පෙරහැරෙ කවි කීම,තාලන් ගැසීම
60	මල් තේ වේ පංගුව	පෙරහැරට මල් වට්ටි දීම
61	හන්කරාවේ මානික්ක පංගුව	පෙරහැරට මල් වට්ටි දීම
62	උඩගෙදර මානික්ක පංගුව	දේවාලයේ නැටීම
63	තනිනිළ පංගුව	දිග්ගෙයි නැටීම,දවුල් ගැසීම
64	මොට්ටුක්කාර පංගුව	දිග්ගෙයි නැටීම,දවුල් ගැසීම
65	උඩගෙදර ඉලංගමේ මොට්ටුක්කාර පංගුව	දිග්ගෙයි නැටීම,දවුල් ගැසීම
66	කොම්බු නිලේ පංගුව	පෙරහැරේදී කොම්බු නැටීම
67	තනිනිළ පංගුව	මාරුවෙන පංගුවකි
68	තෙල් නිළ පංගුව	පෙරහැරෙ නීල පන්දම් ඇල්ලීම,දවුල් ගැසීම
69	යටිකිඳ දවුල්කාර පංගුව	පෙරහැරෙ නීල පන්දම් ඇල්ලීම,දවුල් ගැසීම
70	පාලම තනි නිළ පංගුව	පෙරහැරෙ නීල පන්දම් ඇල්ලීම,දවුල් ගැසීම
71	තටුනිළ පංගුව	දේවාලයට තටු කොළ දීම
72	නයියන්ඩිකාර පංගුව	නයියන්ඩි නැටීම
73	නෝක්කු පංගුව	නයියන්ඩි නැටීම
74	කොට්ටුඅරාවේ කෝලක්කාර පංගුව	නයියන්ඩි නැටීම
75	කොට්ටුඅරාවේ කෝලක්කාර පංගුව	නයියන්ඩි නැටීම
76	කොට්ටුඅරාවේ කෝලක්කාර පංගුව	දේවාලයේ නැටීම
77	පාලම ඉලංගමේ මානික්ක පංගුව	දේවාලයේ නැටීම
78	අශදගම තුනි නිළ පංගුව	කාත්ති වලදී සහ මහ පෙරහැරේදී හේවිසි කිරීම,ගරායක් නැටුමේ දී බෙර ගැසීම
79	කරපේ කුඹකාර පංගුව	කාත්ති වලදී සහ මහ පෙරහැරේදී හේවිසි කිරීම,ගරායක් නැටුමේ දී බෙර ගැසීම
80	කරපේ තොටුපල පංගුව	කාත්ති වලදී සහ මහ පෙරහැරේදී හේවිසි කිරීම,ගරායක් නැටුමේ දී බෙර ගැසීම
81	මොරකඳුරෙ බෙරකාර පංගුව	කාත්ති වලදී සහ මහ පෙරහැරේදී හේවිසි කිරීම,ගරායක් නැටුමේ දී බෙර ගැසීම
82	දවුල් නිලේ පංගුව	දවුල් ගැසීම
83	තම්මැට්ට්න්කාර පංගුව	තම්මැට්ටන් ගැසීම
84	කරපේ හොරණෑකාර පංගුව	හොරණෑව පිඹීම
85	පාලම	මානික්ක පංගුව දේවාලයේ නැටීම
86	කප්හිටවන පංගුව	පෙරහැර කප් සිටුවීම
87	හෙවතැන්නෙහි පංගුව	අලුත්වැඩියාවල් කිරීම
88	අතපත්තු මොහොට්ටි නිලේ පංගුව	රාජකාරි කිරීම
89	කෙවලගල් ඔතු පංගුව	දේවාලයට ඔතු වී බෙරයක් දීම,අළුත්වැඩියා වැඩ
90	ඔතු පංගුව	දේවාලයට ඔතු වී පෑලක් දීම
91	දොඩන්ගොඩගේ ඔතු පංගුව	ඔතු වී පහලොස්දාහක් තනිනිළ පංගුවට දීම
92	දොඩන්ගොඩගේ ඔතු පංගුව	තනිනිළකාරයාට ඔතු වී කුරුණි අටක් දීම
93	මුල්ලේ කුඹුරේ පංගුව	ඔතු වී කුරුණි හතරක් දේවාලයට දීම,අළුත්වැඩියා වැඩ,බස්නායක නිලමේගේ බර ගෙන යාම
94	කපුනිලේට ඔතු දෙන පංගුව	කපුනිලේට ඔතු වී පෑලක් දීම
95	පිරිත් නිලේට ඔතු දෙන පංගුව	පිරිත්නිලේට ඔතු වී පෑල පහක් සහ පැන්ස හයක් දීම
96	ගලහිටියෙ ඔතු පංගුව	ඔතු වී අමුණක් දේවාලයට දීම
97	කපු පංගුවට අයිති කුඹුරේ පංගුව	අළුත්වැඩියා වැඩ
98	ඔතු පංගුව	වී බෙර පහක් දේවාලයට ඔතු දීම
99	බස්නායක නිලේ මුත්තෙට්ටුවේ පංගුව	දේවාලයට සිලිමක් ඔතු දීම
100	ඔතු පංගුව	පැන්ස නමයක් දේවාලයට ඔතු දීම,අළුත්වැඩියා වැඩ
101	තටුකොළ පංගුව	මාරුවෙන පංගුව
102	කපු පංගුව	වී තුන් පෑලක් කපුනිලේට ඔතු දීම,අළුත්වැඩියා වැඩ
103	විලේ හෙවනැන්නැහෙ පංගුව	නළුවෙල නො:24 පංගුවේ කොටසක්
සැලකිය යුතුයි අංක 89 සිට 103 තෙක් පංගු 15 නියමිතව ඇත්තේ දේවාලයට ඔතු දීම පමණි

                                 

එගොඩ වලේබොඩ පරවෙනි පංගු

01	දුර පංගුව	කාත්ති තුනට හකුරු පට්ටා තුනක්,කෙසෙල් කැනක්,බැඳි කඳක් දේවාලයට දීම;එවැනි කත් බස්නායක නිලමේට හා අත්තනායක මොහොට්ටාලට දීම; අළුත්වැඩියා කිරීම
02	මිනුම් පංගුව	කාත්ති තුනට හකුරු පට්ටා තුනක්,කෙසෙල් කැනක්,බැඳි කඳක් දේවාලයට දීම;එවැනි කත් බස්නායක නිලමේට හා අත්තනායක මොහොට්ටාලට දීම; අළුත්වැඩියා කිරීම, දේවාලයට බුලත් දීම,මහ පෙරහැර දිය කපන දාට බස්නායක නිලමේට,අත්තනායක මොහොට්ටාල නිලමේට,අතපත්තු මොහොට්ටාලට,රත්නායක රාළට,පාන් මඩුවට බුලත් දීම
03	ඔතුකාර පංගුව	දේවාලයට බුලත් දීම,මහ පෙරහැර දිය කපන දාට බස්නායක නිලමේට,අත්තනායක මොහොට්ටාල නිලමේට,අතපත්තු මොහොට්ටාලට,රත්නායක රාළට,පාන් මඩුවට බුලත් දීම
04	මනවිර වතුකාර පංගුව	දේවාලයට බුලත් දීම,මහ පෙරහැර දිය කපන දාට බස්නායක නිලමේට,අත්තනායක මොහොට්ටාල නිලමේට,අතපත්තු මොහොට්ටාලට,රත්නායක රාළට,පාන් මඩුවට බුලත් දීම
05	සුදුහකුරු පංගුව	එක කාත්තියකට දේවාලයට හකුරු මුල් 60ක් දීම,එළවළු පිරිවැහි හතරක් දීම,කෙසෙල් කැනක් දීම,තොරණ බැඳීමේ වැඩ
06	අලංකාර පංගුව	එක කාත්තියකට දේවාලයට හකුරු මුල් 60ක් දීම,එළවළු පිරිවැහි හතරක් දීම,කෙසෙල් කැනක් දීම,තොරණ බැඳීමේ වැඩ
07	හිතකැලේ අඟුරුකාර පංගුව	කාත්තිවලට නිලකාරයන් දෙන කත් දේවාලයට ගෙන ඒම,මහ පෙරහැරෙ කොඩි ඇල්ලීම,අළුත්වැඩියා වැඩ
08	මහතුන් නොහොත් ඌලියම් පංගුව	පැණි සහ දුම්මල දේවාලයට දීම,අළුත්වැඩියා වැඩ
09	දවුල්කාර පංගුව	දේවාලයට හකුරු දීම,අළුත්වැඩියා වැඩ
10	හීන්බාලගේ ඌලියම්කාර පංගුව	දේවාලයට හකුරු සහ කෙසෙල් කැන් සහ අළුත්වැඩියා වැඩ
11	පැණිපච්චොල පංගුව	බස්නායක නිලමේටහකුරු සහ කෙසෙල් කැන් දීම සහ අළුත්වැඩියා වැඩ
12	මනතුන්ගේ පංගුව	දේවාලයට හකුරු හා කෙසෙල් කැන් දීමසහ අළුත්වැඩියා වැඩ
13	පැණිපච්චොල පංගුව	මුළුතැනට හකුරු දීම
14	පැණිපච්චොල පංගුව	මුළුතැනට හකුරු දීම
15	පැණිපච්චොල පංගුව	කාත්ති තුනට හකුරු දීම
16	අලංකාර පංගුවේ ඌලියම් පංගුව	බස්නායක නිලමේගේ ඕනෑම වැඩක් කිරීම

නළුවෙල ගමේ ප්‍රවේණි පංගු

01	බත්වඩන පංගුව	මුළුතැන් බෑම
02	හල්වින්නෙ චාමර පංගුව	බස්නායක නිලමේට අඩුක්කු දීම
03	අගල්ගම මලවර පංගුව	කවි කීම ,තාලම් ගැසීම
04	පාලම ඉලංගමේ මොට්ටුක්කාර පංගුව	දේවාලයට ඔතු දීම
05	තම්මැට්ටන්කාර පංගුව	දේවාලයට ඔතු දීම
06	දවුල්කාර පංගුව	දවුල් ගැසීම
07	වෑකුඹුරෙ තම්මැට්ටන්කාර පංගුව	සිංගාරම් කිරීම
08	තොටපල්ලෙ පලිහවඩන පංගුව	දොර යතුරු බාරව සිටීම
09	පොකු‌‌‌‌‍නෙ ගෙබලන පංගුව	දොර යතුරු බාරව සිටීම
10	ජාහලු පංගුව	පිරුවට දීම,වියන් බැඳීම
11	තෙල්කාර පංගුව	නීලපන්දම් ඇල්ලීම
12	උඩගෙදර ඉලංගමේ මලවර පංගුව	පෙරහැරේ කවි කීම
13	කප හිටවන පංගුව	අළුත්නුවර ගමේ 86 වැනි පංගුවේ කොටසක්
14	උඩගෙදර ඉලංගමේ මලවර පංගුව	පෙරහැරේ කවි කීම
15	කල්තොටයාගේ පංගුව	වෙසක් පිංකමට දන් කදක් දීම
16	පෙත්තර කුඹුරේ පංගුව	වෙසක් පිංකමට දන් කදක් දීම
17	යක්දෙහිරාළගේ පංගුව	අළුත්වැඩියා කිරීම
18	මහවලතැන්නේ විහාරෙ පංගුව	දන්දීම සඳහාය
19	මහබෙත්මේ කපුනිලේ පංගුව	අළුත්නුවර නො:3 දරන පංගුවේ කොටස
20	රණබාහුගේ පංගුව	දෙවියන් වැඩමවන විට චාමර සැලීම
21	උඩගංගොඩ වට්ටෝරු පංගුව	උඩවියන් ඇල්ලීම,හඳුන්කිරි පැන් ඉසීම
22	ලන්සකාර පංගුව	රන්දෝලි වැඩමවීම
23	මලපෙ පංගුව	රන්දෝලි වැඩමවීම
24	කුඩාකාර පංගුව	දෝලියට කුඩේ ඇල්ලීම
25	වට්ටෝරු පංගුව	උඩුවියන් ඇල්ලීම,හඳුන් කිරි පැන් ඉසීම
26	විලේ හෙවනැන්නැහෙ පංගුව	පෙරහැර දවස්වල තානායමේ මුරට සිටීම
27	හපුගහ කුඹුරේ පංගුව	රථය සහ බස්නායක නිලමේගේ තානායම මුර කිරීම
28	හල්ඕවිට මනන පංගුව	දර වතුර දීම
29	මුත්තෙට්ටුකාර පංගුව	දෙවියන් වැඩමවන රථය ඇදීම
30	සායක්කාර පංගුව	වියන් බැඳීම,පිරුවට දීම
31	දෙවටේගේ පංගුව	පෙරහැරෙ කොඩියක් ඇල්ලීම
32	යමන් පංගුව	දේවාලයට අවශ්‍ය යකඩ දීම
33	නම්බි වට්ටෝරු පංගුව	උඩුවියන් ඇල්ලීම,කිරිපැන් ඉතිරවීම

Read more »

ජනකවි,ජනකතා

මහනුවර යුගයේ සමහර රජවරු සල්ලාල ජීවිත ගත කළහ.රූමත් කතුන් දුටු පමණින් අන්තඃපුරයට කැඳවා ගැනීම එකල ඔවුන්ගේ සිරිත විය.වලව්වල රූමත් කතුන් ඇතිබව දැනගත්විට රජ අණපරිදි ඇතැම්විට අන්තඃපුරයට ඇතුළු කරගන්නා ලදී.මෙසේ ඇතුළු කරගන්නා කාන්තාවන් යකඩ දෝලි නමින් හඳුන්වන ලදී.මහනුවර රජුන්ට යකඩ දෝලි ගණනාවක්ම විය. මහා නිලමේවරුන්ගේ මහනුවර නගර ආසන්නයේම  වූහයි කියති.රජු යන එන ගමන් වලදී වලව් දෙසද නොබලාම නොගිය බැව් කියන ප්‍රවාද නැත්තේ නොවේ.දිනක් පෑ තැටි පසුකර යමින් සිටි මහරජතුමාට ඒ අසල වලව්වක සිටි 'යහපති' නම් රූමත් දැරියක් දකින්නට ලැබුණි.ඈ කෙරෙහි පිළිබඳව සිතක් ඇතිකරගන ඇය ගැන තොරතුරු සපයන ලෙසට රජු මහ නිලමේට අණ කරන ලදි.තම වලව්වේ වැඩකාරකමට සිටි එතෙක් වැඩිවිය නොපැමිණ සිටි කෙල්ල වෙත රජුගේ සිත ඇදී ගියබව දැනගත් නිලමේ මෙසේ රජතුමාට ලියා සැල කළේලු.

පුරා තන තිසරු දෙහි ලෙලි විතර        ඇති
නුරා කරන වයසත් පැමිණුනේ          නැති
පුරා වයස දහතුනකට විතර                ඇතී
කොරහ වහල්කඩ බැඳී කොඩිය          යහපති

ලැජ්ජාවට පත්වූ රජතුමා ඊට පසුව දැරිය ගැන ඇසුවේ නැතිලු.

උපදේශ කවි

කරදර සිතට වැදුනම පැමිණෙන            වෙහෙස 
ජරමර දෙකම පැමිණෙයි පුරුවේ           දෝස
වැරසැර රැගෙන දඩසැරියක්                   සිතුවිලස
වැරදුන තැනට කවුරුත් නැත තමන්       මිස   

දුක දන්නෝ ලොව කාටත්                    පිහිටවෙතී
බණ දන්නෝ ලොව සතහට බණ          කියතී
අණ දෙන්නෝ රජසේවේ වැඩ               කරතී
විලි දන්නෝ නොසිරිත් කම් නොම        කෙරෙතී

නැත මිතුරෙක් දැනගත් සිල්ප                 මිස වෙන
නැත හතුරෙක් මත්පැන්  හා                     සදිසිවන
නැත අදරෙක් දරුවට දෙගුරු මිස              වෙන
නැත බලයක් තිසරණබල සදිසි                 වෙන

දහම් ගැටයක්

කලකට කට මවු දෙතනේ     කිරිබීම
කලකට කට රස පලවැල       වැළඳීම
කලකට කට කෙතකට බැඳී   වැටසේම
කලකට කට පටමල්පේකට    සේමා

අදහස:-
මේ දහම් ගැටයෙන් ජිවිතයේ නිස්සාර බව මැනවින් පිළිඹිබු කරයි.කලකදී කට මවු දෙතනේ කිරි බොයි.ඒ බිලිඳු සමයෙන් පසු පළවැල රස අනුභව කරන කට වයසට යත්ම වේලකට බැඳී වැටක් සේ වෙයි.දිවියේ ජරාපත්වන ස්වභාවය කියන්නට ගත් මගනම් ඉතා අගනේය 

තේරවිලි

පිටතින් සම ඔපයි පහටිය කුඩා            ඇස
ඇතුලින් මස් රැඳුන කොහු ඇටය පිට    ඇත
නිතියෙන් අඹුලමුත් විළිකුන් කල           රසැත
රසයෙන් රසැති ගෙඩිය තෝරා දෙනුම  වෙත

නිරතුරු වෙහෙස දෙන හතුරෙකු මෙන්  මෙමට
පළතුරු ගැන අසයි එකිනෙක ගෙන       කපට
මෙවියුරු හැඩය ඇති පලනම් සිතෙන      විට
ගනිසුරු ලොබය කළ අඹ ගෙඩිය දෙනු    සෙට

නිබඳ මෙරුක කිරි වැගිරෙන පසඟ   තුල
නොමඳ කිරි මිරෝ වනසන බුදින    කල
සුවඳ සබන් සැදුමට කිරි ගනි           මෙකල
සබඳ මිතුර තෝරා දෙනු මට            මෙපල

පෙම් වඩවන දෙයකි සුමිතුරු            හැමවිට
දුම්බොන අයට ගුණදෙන කෑමකි      ලයට
පෙම් විලසින් විහඟුන් කණ                ඉදුනුවිට
මින් දැනගන්න ගස්ලබු බව මිතුර      සෙට 

Read more »

අඬහැරය

පුරාණ අඬහැරයද ජන කවියකි මිනිසාත් මී ගවයාත් අතර බැඳී පවතින සහජීවනය ඒ තුල ගැබ්වි ඇත

තිසරණ සරණයි බුදුන් දැකපන්
මගේ සුරතල් මීවෝ උඹ උවෝ ..උවෝ ...උවෝ ...
සතර වරන් දෙවියන් හට බාරයි
මගේ මී වස්සා උඹ උවෝ.. උවෝ ...උවෝ ...
තිස්තුන් කෝටියක් දෙවිපිහිටයි
මගේ වහු දරුවෝ උවෝ.. උවෝ ...උවෝ ...
කතරගම දෙවි රැකපන් මගේ මී වස්සා උඹ
උවෝ.. උවෝ ...උවෝ ... උවෝයි..

දෙවි පිහිටෙන් ඇදපන්කෝ මගේ වහු දරුවෝ
උඹ උවෝ .. උවෝ.. උවෝයි ... 
බුදුන් දැක නිවන් දැකපන් මගෙ එළවස්සා 
උඹ. උවෝ.. උවෝ ...උවෝ .... හෝ
මුල්ලෙන් පලයන් මගෙ කිරි මීවෝ
උඹ. උවෝ.. උවෝ ...උවෝයි
ඉරු දෙවියන් ඉර මුදුනේ කව නැත
පලයන් මගෙ මී වස්සා උඹ
උවෝ.. උවෝ ...උවෝයි

පින් අත්වෙයි උඹලට අප්පේ
දුවෝ...හෝ ...උවෝ ...උවෝ ...උවෝ...
උඹට පව් නැත මගෙ මටිය වස්සා උඹ
උවෝ.. උවෝ ...උවෝ ... හෝ ...
ගොඩට යන්ට. දැන් දැන් දැන් ළඟමයි
උඹ . උවෝ.. උවෝ ...උවෝ ... 
දෙවිපිහිටයි මගෙ වහුපැටියෝ උඹලට
උවෝ.. උවෝ ...උවෝ ...

තිසරණ සරණයි උඹලට මගෙ වහු දරුවෝ
උවෝ.. උවෝ ...උවෝ ...හෝ
මගෙ බත් පත සලසා දෙන
කිරිදුවෝ ....හෝ ....හෝ ....හෝ
මේ වෙල්යායට උඹේ පිහිටමයි
වහු දරුවෝ ...උවෝ.. උවෝ ...උවෝයි
දැන් වැඩ ඉවරයි ගෙදර යන්ට යන්
එලවස්සා උඹ උවෝ.. උවෝ ...උවෝ ... උවෝ....
හෝ .... හෝ .... හෝ ..... 

Read more »

පන් යක්කම

පැරණි කෘෂිකාර්මික සමාජයේ පන් කපා පැදුරු විවීමකාන්තාවන්ට උරුම වූ ඉතා වැදගත් කාර්යයක් ලෙස සැලකුණි නැන්දම්මා තම පුත්‍රයාට කරකාර බැඳ අලුතින් කැඳවාගෙන ආ තම ලේලියට කෑම පිසීම මෙන්ම පැදුරු විවීමට දක්‍ෂ තැනැත්තියක් දැයි සොයා බැලුවේ මේ නිසාය.වෙලට ගොස් පන් කැපීම,පන් විවීම ඇතුළු ඊට අයත්සියලු කාර්යයන් ගැන පන්නම් කතුර ,පැදුරු මාලය වැනි පොත්පත් ලියැවුණේ පන් කර්මාන්තයට එදා ලැබුණු වැදගත්කම නිසාය. 

මේ නිසාම පන් යක්කම නමින් යාතුකර්මයක් (පුජා ක්‍රමයක්) පැවැත්වූ බව ද පෙනේ. පන් යක්කම හා බැඳුන (පට්ටිය ගිරි),(ඔකඳ ගිරි),(කොටපල බිසව්),(වෙළඹ ගිරි),(දොළොස් ගිරි) වැනි මනුෂ්‍යත්වය ඉක්මවූ දෙවියන් හෝ යක්‍ෂ පිරිසක් ගැන පන් යක්කමට අදාළ බොහෝ කවිවල සඳහන් වේ.පහත රට ශාන්ති කර්ම අතර ඇති රට යකුම හෙවත් රිද්දි යාගයේදී ද පන් යක්කම ආශ්‍රිත කවි ගායනා කරනු ලබන අතර මෙම කවිවල ඊට වඩා සුවිශේෂත්වයක් දක්නට ඇත.කෙසේ වෙතත් පන් යක්කම හා පන් කර්මාන්තය ආශ්‍රිතව ඇති පුරාණ ජන කතා ,ජනකවි හා වෙනත් ජනශ්‍රැති එකතු කළහොත් ඒ තුලින් පන් යක්කම පිළිබඳව වැදගත් තොරතුරු රාශියක් දැනගත හැකිවනු ඇත

1. පට්ටි ගිරි කොයි වාගෙද         ඉන්නේ
   මුට්ටි පුරා කිරි දෝගෙන           ඉන්නේ
   කච්චි පුරා සුදු සේල               අඳින්නේ
   පට්ටි ගිරි පන් විලට               වඩින්නේ

2. සත්තු ඇවිත් විල වටකර         හිටියට
    නැට්ටු අපිත් යන් කඩිනම්        ගමනට
    මොට්ටු දමයි පන්නම් අපෙ     නුවරට
     කිට්ටු කළා විල පේනා            එතෙරට

3. පාන්දරම ගොස් පන් විල          දැකලා
    යාන්වෙලා තිබු පන්                 උදුරාලා
    මාන් බලන සේ අතපත             ගාලා
    හීන් හීන් පන් තිබුණිය               ලීලා

4. වයිර බැඳපු ලියො පන්              උදුරන්නේ
    සයුර බලා ගැඹුරට                   නොබසින්නේ
    ඔමරි ලියන් පෑ කොළ               පාගන්නේ
    ඔමරි නුරාවෙන් පන්                 උදුරන්නේ

5. තුඩ ගසමින් කූඩැල්ලන්             දෙපයට
    උඩ පනිමින් ලඳ කාපි කියා         සිට
     අඬ ගසමින් ලඳ දුවයි කියා         ගෙට
      ගොඩ පනිමින් පන් උදුරා         හනිකට

6. ජෝඩු වෙලා පන් උදුරා               ගන්නේ
   ජෝඩුව එනකොට විල යට             යන්නේ
    නානු වෙලා විල කිම්ද                  බලන්නේ
    පාරුවකින් වද සොයලා                ගන්නේ

7.ගොඩ නැගුනා පන් විලෙන්            බොලන්නේ
   මඩ තැවරුණ අත පය                   සෝදන්නේ
   අඬහැර පන් කවි සින්දු                  කියන්නේ
   කඩවර කළ හැම දෝස                  මුදන්නේ

8.සෙවනැල්ලට පන් ගොස්               දමමින්නේ
   කොළ කඩමින් පන් මිටි                බඳිමින්නේ
   දිය පිළි ගලවා සේල                      අඳින්නේ
    පන් ටික අරගෙන එන්න               වරෙන්නේ

9. රොදින් රොදට ගොස් වැල්             අදිමින්නේ
   අගෙයි කියා පන් කොළ                 කඩමින්නේ
   රඟේ නොදැන පන් මිටි                 බඳිමින්නේ
   ගානක් දී පන් මිටි                         අරගන්නේ

10. එපන් ගෙනා විට මොකද               කරන්නේ
      අව්වේ දමමින් වේලා                    ගන්නේ
      තැනින් තැනට පන් පට්ටි               දමන්නේ
       පට්ටි දමා පන් වේලා                   ගන්නේ

11. පැහිච්ච පන් ගෙන වෙන  ම          දමන්නේ
      හොඳ හොඳ දළු පන් කට්ට            දමන්නේ
      කට්ට බැඳපු පන් වෙන ම              දමන්නේ
      මේ දේ සමඟින් පතැඟි                 පොවන්නේ

12 . රටට ගමට ලඳ හොඳ                   පාරට්ටුව
       කවට සිනාවට ලඳ හොඳ               මුට්ටුව
       කවට සිනා නොකියන් ඉඳ              කිට්ටුව
        මුලට වියාපත් හංස                      පුට්ටුව

13. දිලිසෙන මාලේ වියපන්                 පැදුරට
      හාවුන් ගිරවුන් වියපන්                  පැදුරට
      අලි කොටි වලසුන් වියපන්             පැදුරට
       මේ ලෙස වියපන් සමයම             පැදුරට

14. ඉසට සියුම් ලා කෝට්ටේ                වියඥ්ඥයි
      පයට පියුම් ලා කෝට්ටේ               වියඥ්ඥයි
       නාග රටාවෙන් පැදුරක්                 වියඥ්ඥයි
       ඉරිදා සමයමට පැදුරක්                  වියඥ්ඥයි

15. සතුටින පන් වියා වේලා සොඳ         ලෙසින
      මන පිනවන අයුරු වියු පැදුරු          අරගෙන
      ගෙන දෙන සුවය නිදි දෙව්දුව         වැළඳගෙන
      සැතපුන මැනවී සිහිකර තිසරණ       සරණ

Read more »

රන්වල දෙවියෝ

කෑගල්ල නගරයට යාබදව රන්වල යන නමින් ගමක් ඇත.දෙවන රාජසිංහ රජුගේ  කාලයේ රජුට අයත් වී අටුවක් නැත්තම් පත්තායමක් ඒ ගමේ තිබිණි.එකල රන්වල ගමේ අලවතුරේ රාළ, ගණේගොඩ රාළ යන නමින් හැඳින්වූ දැඩි මිතුදමින් වෙළී සිටි තරුණයෝ දෙදෙනෙක් වූ හ.ගමේ කෙබදු කටයුත්තක් වේ නම් එය මේ දෙදෙනා ගේ එකතුවෙන්ම සිදුවිණි.අසල්වැසියෝ එය හොදින් දැන සිටියෝය.දිනක් රන්වල ගමේ තිබුණු රජු ගේ පත්තායම බිඳ එහි වූ වී සොරා ගෙන ගොස් තිබේ.එවැන්නක් ගම තුල කිරීමට සමත් කිසිවෙකු නොවුහ.

අසල ගම්වලින් මේ ගමට වැද එවැන්නක් කිරීමට සමත් කිසිවෙක් නොවුහ.එවැනි දේ ඒ කාලයේ ගම්වැසියන්ට නොදැනී පිටගම් වාසියෙකුට සිදු කිරීමට කොහෙත්ම ඉඩක් නොතිබිණි.ගමේ සිදුවෙන වැරදිවලට මුළු ගමම වගකීමට ගැමි සමාජයම බැඳී සිටීම ද එකල සිරිත විය.මේ නිසා පත්තායම බින්ද හොරු කවුරුද යන්න ගැමියන්ට රහසක් නොවිය.මේ කාරණය පත්තායමේ ලේකම් මගින් සෙන්කඩගල මහවාසලට දැනගන්න ලැබිණි.මේ නොහොබිනා අකටයුත්ත සිදු කර ඇත්තේ අලවතුරේ රාළත්,ගණේගොඩ රාළත් බව රාසිං දෙවියන්ගේ කනටද ගියේය.දැඩි කෝපයෙන් වේලි ගිය රාසිං දෙවියෝ පහත් ක්‍රියාවක් සිදුකළ ඒ දෙදෙනා අල්ලා මහා වාසලට ඉදිරිපත් කරන ලෙස කටුපුල්ලේ ඇත්තන් හට අණ කළෝය.

ආඥා වේවැල සුදු පිරුවටකින් ඔතා ගත් කටුපුල්ලේ නායකයා (රාළ)තව දහදෙනෙකු ගෙන් සමන්විත අලවතුරේ රාළටත්, ගණේගොඩ රාළටත් දැනගන්නට ලැබුණේ ඒ වැන්නක් සිදුවිය හැකිබව සිතමින් ඔවුන් විමසිල්ලෙන් සිටි නිසාය.කටුපුල්ලේ ඇත්තන් ගන්නොරුව පසුකොට දන්තොට වතුර මැදින් බලන කඩවතට ළඟාවන්නට පෙර රන්වල රාළ ලා කිසිවකුටත් නොදැනෙන අයුරින් රන්වලින් පිටමංව යටියන්තොට මැදින් අවිස්සාවේල්ලට ළඟා වීමට වැඩි කාලයක් ගත කලේ නැත.කෙමෙන් කැළණි ගඟබඩට ගිය ඔවුහු කැළණි ගඟේ ද තවත් පහළට ගොස් තවදුරටත් කන්ද උඩරට රාජධානියෙන් ඈත් වීමට සිතා ගං ඉවුරේ වූ උණ ගස් කීපයක් කපා අසල ලැහැබෙන් වේවැල් ඇද ඒවා එකට ගැට ගසා පහුරක් තනා ඒ මගින් ගඟේ පහලට ඉතා ලෙහෙසියෙන් ම පා වී ගියෝය.

මෙසේ ගඟ පහළට සෑහෙන දුරක් ගිය  අලවතුරේ රාළ"දැන් මට නම් ගියා ඇති" කියා  ගං ඉවුරේ පහුරෙන් ඉවත්වී ඒ අසල වූ ගමේ පදිංචි විය.ගණේගොඩ රාළ ඒ පහුරෙන්ම තවත් පහළට ගොස් ගඟබඩ වූ දන්ගල්ල නම් ගමේ පොරොත්තු වුයේය.මේ රාළ වැඩිකල් නොගොස් ඒ ගමෙන්ම තරුණියක පාවා ගති .අලවතුරේ රාළ පදිංචි වූ ගම කිසිම දියුණුවක් තිබු තැනක් නොවේ.එහෙත් ඒ පෙදෙසේ වූ කැලෑ එළි පෙහෙළි කොට නව ගමක් උදා කිරීමට ඔහුට එතරම් කාලයක් ගියේ නැත.මෙසේ තමා අලුතින් ඉදි කළ ගම්මානයට තමාගේ ජන්මභූමියේ නම වන "රන්වල"යන නම තබන ලද්දේ උපන් ගම කෙදිනකවත් අමතක කළ යුතු නැත යන්න සිතා විය යුතුය.

ගමේ නව දියුණුවක් උදා කළ මේ රාළට ගම්වැසි කාගේත් ගරු බුහුමන් නොමදව ලැබිණි.ඇතැමකු ඔහු දෙවියෙකු වශයෙන් සලකා ඇත්තේ ඔහු තුල පැවතී පරහට දයාව දැක්වීම,කරුණාව,ඉවසීම,සමානාත්මතාවය වැනි මිනිස් සාරධර්ම තම හදවත නිදන්කර ගෙන සිටින මහත්මයෙකු නිසාය.අලවතුරේ රාළ කම් වූ පරිදි මිය ගියේය.ඔහු මිය ගියත් ගමට අරක්ගෙන සිටින බවට   ගැමියෝ දැඩි සේ විශ්වාස කළෝය.එබැවින් ඔහු වෙනුවෙන් දේවාලයක් ඉදිකොට එය රන්වල දෙවිට කැප කිරීමටද ඔවුහු කටයුතු කළෝය.කැළණි ගඟට අරක්ගත් රංවල දෙවියාම බව ඔවුන්ගේ විශ්වාසය විය.

කල්ගිය පසු ඒ දෙවියාට පඬුරු වෙන් කිරීම,පහන් දැල්වීම,බලිතොවිල් පැවැත්වීම ආදියද ගැමියෝ පෙළඹුනෝය.මේ දෙවි ගේ විවිධ හාස්කම් පිළිබඳව ද නොයෙක් ජනකථා ඒ පෙදෙසින් අසන්නට ලැබේ.තෝල්කයෙකු ගොළුවිම,කිඹුල් කොටාගේ බරා නැමැත්තාට කැළණි ගඟේ ගුහාවක දී රන්වල දෙවියන් හමුවීම ,ගලේ වූ යකඩය වැනි කතා ඒ අතර වේ.මේ කතාව තවත් අයුරකින්ද සඳහන් වී ඇත.
මහනුවර විසු දෙවන රාජසිංහ රජුගේ කාලයේ (1635-87)ඒ  රජුගේ පත්තායමක් (වී අටුවක් )කෑගල්ල අසල වූ රන්වල තිබිණි.

මේ පත්තයම අසවන්රාළ,රන්කිරි රාළ යන තරුණයන් දෙදෙනා විසින් හොදින් ආරක්ෂා කරන ලදී.එහෙත් මේ  ගැන ඊර්ෂ්‍යා කළ පිරිස අර දෙදෙනාට හොරෙන් පත්තයමට ගිනි තබා ඒ බව මහවාසලට දන්වා තිබේ.උරණවූ මහා රජතුමා ඔවුනට දඬුවම් පමුණුවන්නට යනබව කෝහල්සිරි රාළ නැමැත්තා මගින් දැනගත් උක්ත තරුණයෝ දෙදෙනා ගමින් පැන අරන්දරට අවුත්,ගුරුගොඩ ඖඅ දිගේ ගඟ පහළට ගොයෝය. ඔවුන් විසින්ම සාදා ගනු ලැබූ පාරු 2ක් මගින් යන ඒ දෙදෙනා ගෙන් අස්වාන් රාළට ගඟබඩ ගී කියන කතකගේ ගී රාවය ඇසිණි.අස්වාන් රාළට එයට වශි වී ඔහුද එයට ප්‍රතිගීයක් ගැයිය.එය ගී සංවාදයක් බවට  පත් වී එහි අවසන වුයේ අස්වන්රාළ ගේ ගමන එතනින් කෙලවර වීමයි.මෙය දැනගත් රන්කිරිරාළ තමා යන ගමන නතර  නොකර සියනෑ කෝරළය පෙදෙසට ගොස් එහි ගිරිදර නතර විය.

අඹන්වල රාළ ගී ගැයූ යුවතිය සමග ඇගේ නිවසට ගියෝය.එහෙත් නුපුරුදු සිට පළාතක තරුණයකු සමඟ පැමිණි තම දුව පිළිගැනීමට ඇගේ දෙමාපියෝ කිසිසේත් කැමැත්තක් නොදක්වුහ.අසරණ මේ යුවල ඒ ආසන්නයේම වූ දංගොල්ල යන ගමේ පදිංචි වුහ."ලැගුම්බිම" යන ගල්ලෙනේ වාසය කල ඔවුහු හේනක් කොටා හේන් ගොවිතැන් කළෝය.අද හේනේගම යනුවෙන් හඳුන්වන්නේ ඒ ගොවිපලයි.ඔවුන් ගේ මඩ ගොවිතැන් භුමිය අසවන් වෙල යනුවෙන් හැඳින්වේ.ටික කලකදී යුග දිවිය ඇත හල අස්වන්රාළ කැළණි ගඟබඩ අසපුවක් ඉදිකොට එහි විසිය.හුදකලාව විසු හේ තම අසපුව වටා රාත්‍රියේ පහන් දැල්වීම සිරිතක් කරගනී.

ගඟේ පාරු පදින අයට එය පහසුවක් විය.අස්වන්රාළ මිය ගිය පසුවද එම පහන් දැල්වීම පාරුකරුවන් ද අසල්වැසියන්ද නොකඩවා සිදුකර ගොස් තිබේ.අවුරුදු ගණනක්ම එය එසේම විය.ඒ අතර ඒ අසල වූ තොටුපොළ භාර ගත් අයද එම කාර්යය ඉටු කර තිබේ.තොටුපොළ භාරකරු වෙත පැමිණි පොඩියා නමැති ද්‍රවිඩ ජාතිකයා ද එය එසේම සිදු කර ඇත.1900-02 කාලයේදී අවිස්සාවේල්ල දුම්රිය මාවත ඉදිවීම නිසා පහන් දල්වන ස්ථානය මදක් වෙනස් කොට තාර පාර අසල ට ගෙන ගොස් තිබේ.
ඉහත සඳහන් ආකාරයට බිහි වූ රන්වල දෙවියා ගෙන් ගොවිතැනේ ආරක්ෂාවත්,මහ ජනතාවගේ  ආරක්ෂාවත් සිදුවන බව ඒ අවට ගැමියන්ගේ දැඩි විශ්වාසය විය.

මේ නිසා සිතාවකින් පහල පෙදෙසේ රන්වල දෙවියන් පිදීම බහුලව සිදු කෙරේ.කොළඹ -අවිස්ස්සවේල්ල මහ මාවතේ හිඟුරල අඹ ගසක් ඇත.එහි රන්වල දෙවියන්ට පුද පුජා පැවැත්වේ.ඇස්වත්ත,මල්වාන වැනි පෙදෙස්වල ද කැළණි ගඟ දෙපසද මෙම දෙවියා වෙනුවෙන් පුහුල් පහන් දැල්වීම සිදු කෙරේ."හිඟුරල පහන"නමින් හැඳින්වෙන ස්ථානය පඩුරු ලන තැනකි.මෙයින් රන්වල දෙවිහාමුදුරුවන්ගේ බැල්ම නොඅඩුව ලැබෙන බව මහ ජනතාවගේ විශ්වාසයයි.රන්වල දෙවියන් පිලිබඳව කවි සහ යාදිනි කිහිපයක් පහත දක්වා ඇත

1. කපක් පළමු කකුසඳ මුනිඳුන්     පෙර
   උපත මෙසේ පවසන් දැන් කවි     කර
   විපත පැමිණි දා දෙවිඳු මතක්      කර
   උපත කියන් තෙද රන්වල      පිරිවර

2. අගේ වඩන රන්වල         දෙවියන්නේ
  නුගේ විමානේ වාසේ          කරන්නේ
  ගඟේ දෑලේ දෙවි වාසේ      කරන්නේ
  අගේ අසන් රන්වල            දෙවියන්නේ

3. පිං ඇති රන්වල දෙවිඳු       වඩින්නේ
  පිං ඇති සව්සත දුකින්        මුදන්නේ
 මං දුන් යහනේ කෙළි පුද    ගන්නේ
 රන්වල දෙවි මල් යහන්      වඩින්නේ

4. පහළ යන්නේ නැකතින් පහුරු    පැදගෙන
  රන්වල දෙවිඳු හට පුද පඬුරු         බැඳගෙන
 කැළණි ගඟේ දිය අඩු වැඩි             බලාගෙන
 අපිත් යමුකෝ රන්වල දෙවිඳු         වැඳගෙන

5. සමනල අඩවියේ වැහි කළු           පෙනෙන්නෙ
  නොගලා තිබුණු ගඟ බොරදිය      නඟින්නේ
 පෑදී තිබුණු ගල් මුල් යට                   කරන්නේ
 නයිවල වෙලේ රං ආඳා                    ලගින්නේ

6. විස්තර හොඳ දේව අඟුල මැදට දෙවි      වෙලා
  තොස්කර ඇලි වල නාදේ ඇසෙයි දිය     කෙලා
 සුන්කර කෙළෙසුන් දුරු කළ සිතක් මුල්   කළා
 පිං කළ රන්වල දෙවි එහි යහන්                  බලා


7. ගතට සුදු සළු පළඳමින් මුණ්ඩාසනය
                                                       සිරසේ දරා

 සුරත සැරයටි දරන සුරිඳු දෑලේ 
                                        දෙනමක් පිරිවරා

 නෙතට දිව ඔබෙ පෙනෙන විලසට මෙලෙස 
                                                         පවසමි නම්කරා

 තෙදැති රන්වල දෙවිඳු මෙ ආතුර රකිනු මැන
                                                            දොස දුරුකරා 

Read more »